marka mundiala egin du Idoia Etxeberriak

Ez 135, ez eta 137,5 kilo; 138 kiloko harri errektangularra jaso zuen atzo Idoia Etxeberriak Irurako plazan, orain arte emakume batek inoiz egin ez duena lortuz. Jasoaldi bakarra ere ez zion eman; bost eman zizkion bost minutuko txanda batean.
Sekulako jendetza batu zen atzo Irurako plazan Etxeberriaren marka ikusteko asmoarekin, eta ez zen gutxiagorako: emakume batek inoiz plazan egin ez zuena egin behar zuen. Saioa hasi aurretik egin zuten pisatzea, eta 138 kilo pisatu zituen harriak; Etxeberriak berak, aldiz, 90 kilo pisatu zituen. Oriotarrak 17 urte besterik ez ditu.
Marka egin aurretik 100 kiloko errektangularra eta 120koa erabili zituen. 100ekoari hiru jasoaldi eman zizkion, eta, horrekin aritu ostean, 120koa jarri zuen aurrean. Lehen aldiz heldu zionean ihes egin zion, baina bigarrena jaso egin zuen, eta bere burua ahalegina egiteko prest ikusi zuen.
Epaileak txistua jo bezain pronto heldu zion 138 kiloko harriari. Gerrira ekarri, han lehenengo ongi kokatu, eta bi kolpetan bizkarrean berdinduta zeukan. Marka egina zeukan, eta hori egiten 13 segundo besterik ez zituen behar izan.
Astean zehar berak ere iragarri zuen lehen jasoaldia ongi egiten baldin bazuen, jasoaldi bat baino gehiago eman nahi zizkiola, eta horixe egin zuen. Bigarrena eman zion, eta, hori lortu zuenean, artean minutu eta 42 segundo bakarrik ziren beteak; hortaz, beste hiru minutu pasa geratzen zitzaizkion denbora agortzeko.
Bigarren jasoaldiaren ostean atsedentxo bat hartu eta gero, hirugarrena egiteko heldu zion harriari, eta hori ere lortu zuen. Hain zuzen ere, hiru minutu justu bete ziren une horretan bertantxe. Denbora bukatzeko, beste bi minutu geratzen ziren, eta Idoiak gehiago nahi zuen.
Laugarrengoari ere heldu zion, eta hura ere ongi jaso zuen, eta artean 50 segundo geratzen zitzaizkion, laugarren jasoaldia amaitukoan 4 minutu eta 7 segundo baitziren igarota. Berak bosgarrena nahi zuela zioen, eta laguntzaileek aurrera egiten utzi zioten; hala, harriari berriz heldu eta 4 minutu eta 52 segundoko denborarekin batera amaitu zituen lanak, marka eginez.
Amaieran marka latza utzi zuen eginda, guztira bost jasoaldi eman baitzizkion. Horrenbestez, orain arte emakumezko batek plazan egin ez duena egiteaz gain, marka bikaina utzi zuen, bost jasoaldiko marka handia baita.
Bere lanak amaitutakoan, pozez txoratzen zegoen Orioko neska gaztea. «Gogorra izan da, baina dena ongi joan da. Oso gustura geratu naiz», esan zuen.
Azkenean 138 kilokoa berdindu zuen bizkarrean. «Hasieran 135ekoa jasotzea pentsatu genuen, baina gero 11 arroakoa jasotzea erabaki nuen, ongi nengoelako. Harria 138 kilokoa egin didatenez, bera jaso dut», esan zuen.
«Aurrera jarraituko dut»
Jasoaldi bat nahikoa zuen marka egiteko, baina berak bost eman zituen. «Bat nahikoa nuen, baina garbi neukan lehenengoa ongi jasotzen banuen gehiago emango nizkiola, eta horrela izan da. Lehen jasoaldia ongi eman diot, eta gero animatu eta bost eman dizkiot. Oso gustura geratu naiz», esan zuen.
Gerora zer egin behar duen ere garbi dauka: «Hemendik aurrera harriak jasotzen jarraitu behar dut. Nik kirol honekin gozatu egiten dut, eta segi egingo dut aurrean jartzen dizkidaten harriak jasotzen», esanez amaitu zuen jarduna. Atzo garbi utzi zuen oraindik ere asko egin dezakeela gora. Atzo urtebete agertu zen lehen aldiz plazan 120 kiloko harria jasotzeko; lau aldiz berdindu zuen. Atzo 18 kilo gehiagokoa bost aldiz jaso zuen